DBHko 2. mailako ikasleak Artetako iturburuan eta Egillorko edateko uren araztegian izan ziren joan zen asteartean, Xabier Arrizibita eta Patxi Arellano irakasleekin. Jaso Ikastolako neska-mutikoek eguraldi eguzkitsua eta beroa izan zuten, inguru ederraz gozatzeko modukoa.
Artetako iturburua Olloibarrean dago, Iruñetik 20 bat kilometrora, eta toki ezin egokiagoa da lur azpiko uren mundua deskubritzeko. DBHko ikasleek Belen Ausejo monitorearen ahotik jaso zituzten iturburuaren gaineko azalpenak. Artetako iturburua elikatzen duen akuiferoak 100 km koadroko eremu bateko ura eta elurra biltzen ditu, Andia mendiko belardi zabaletan, eta iturburutik ateratzen den lur azpiko ura Iruñerrira bideratzen da. Hiriburuan kontsumitzen den uraren erdia baino gehiago handik ateratzen da, hain zuzen ere.
Iturburua ezezik, han bertan dagoen ingurumen hezkuntzako zentroa eta Egillorko edateko uren araztegia ere bisitatu zituzten Jaso Ikastolako ikasleek.
