Ikasturte honetan, Nafar Gobernuko Zubiarte Euskaltegiaren eskutik, ikastolan bertan euskara ikasten aritu da guraso talde bat. 15 bat lagun osotara astean hiru egunez, 15:00etatik 16:30era A1 maila egiten.
Horretaz gain, “mintzalagun” guraso talde bat ere izan dugu ostiralero, 15:00etatik aurrera elkartu dira kafetxo baten bueltan euskaraz hitz egiteko. Izan ere, batzuetan euskara ikasi edo jakin arren ez ditugu euskaraz hitz egiteko aukera gehiegi izaten eta horrelako taldeetan “mingaina” askatzera eta lotsa galtzera ere ausartzen gara. Bakoitzak ahal duena eta bere mailan.
Hurrengo ikasturtean bi talde hauek indartu eta zergatik ez, besteren bat sortzeko erronkari eutsi nahi diogu.
Batetik, JASO “Euskaltegian” izena emateko epea ireki da, maiatzaren 28tik ekainaren 15era arte izanen dela. Izen ematea Zubiarte euskaltegiko webgunean egin behar duzue:http://euskaltegi.educacion.navarra.es/web/.
Mintzalagunek oraingoz oporrak hartu dituzte eta hurrengo ikasturtean urritik aurrera berriro elkartzeko deialdia luzatuko dugu.
Ikastolatik izena ematera animatu nahi zaituztegu bi aukeretatik edozeinetan.
