Aurreko ikasturtean hasi ginen LH6. mailan, EKI proiektuaren barruan, bertsolaritza lantzen Nafarroako Bertsozale Elkarteko laguntzaz. Ikasturte honetan ere, lehenengo hiruhilekoan hasitako ibilbideari amaiera eman diogu aste honetan izandako bertso saioan. Bertan, gure ikasleek ikasitako guztia praktikan jartzeko aukera izan dute ikastolako “plazan”, eskakizun handiko publikoaren aurrean; beraiek.
Gure LH6. mailako ikasleek, prestakuntza honen bidez baliabideak eskuratzen dituzte ikasgelan bertsogintza landu ahal izateko. Izan ere, komunikazio gaitasunak –bereziki mintzamena eta hizkuntzaren berezko erabilerak– garatzeko tresna eraginkorra da bertsolaritza. Hala, beren buruarengan konfiantza eta segurtasuna har dezaten baliagarri suertatzen da. Modu berean, komunikazioa hobetu eta hitzezko jarioa fintzeko erraminta indartsua da bertsoa.
Gainera, arlo kurrikularra amaituta, hemendik aurrera bertso tailerrean parte hartzeko aukera eskaintzen zaie eta taldetxo bat arituko da orduz kanpoko ekintza bezala bertsogintza lantzen. Hau da, iraupena luzatzeko proposamena egiten da esperientzia laburregi geratu dela iritzita, gustura aritzen diren seinale.
