Bi urte igaro dira Jaso Ikastolako Bizikidetza Plan berria sortu genuenetik eta bi urte hauetan Jaso komunitatea osatzen dugunon Bizikidetza hobetzeko jarduerak ugariak izan dira. Horren lekuko da iaz DBHko maila guztietan abian jarri genuen ikasgai berria: Bizikidetza. Ikasgai hau emateko Baketik elkarteak bere Izan Proposamenean proposatzen duen materiala erabiltzen dute Bizikidetza irakasle diren Andoni Sagastibeltzak eta Unai Arellanok. Proposamen honek ikasleen zein helduon bizi kalitatea hobetzeko oso erabilgarriak izan daitezkeen ikaskuntzak planteatzen ditu eta hori dela eta, ikasturte honetan Jaso Ikastolako irakasle guztiok Izan Proposamenaren inguruko formazioa jasotzen ari gara, Baketik-eko buru den Jonan Fernandezekin. Gaian interesa duenarentzat www.izanproposamena.org web orrian informazio gehiago aurkituko dugu. Hona hemen proposamen honek landu nahi duen filosofia laburbiltzen duten bi esaldi, Jonan Fernandezen hitzetan:
“Bizitza eta elkarbizitza jorratzeko erreminta kaxa bat eskaintzen dugu”.
“Seme-alabei edo ikasleei zerbait morala edo etikoa erakutsi nahi diegunean, agindua edo irakaspena beharrezkoa da, baina ez nahikoa. Horregatik, bizipen ikaskuntza batzuk bilatu behar ditugu gauzak norberak frogatzeko, norberak esperimentatzeko, berdin du 8 edo 14 urte eduki.”