Orain bi urte hasi ginen ikastolako berdeguneak probesten Haur Hezkuntzako ikasleentzako baratza egin zezaten. Arrakasta itzela izan zen eta gure baratza handituz joan da tamainaz baita uztaz ere. Aurten, beste urtetan ez bezala, udan ere barazkiak landu ditugu eta dagoeneko Ikastolako sukaldean tokian tokiko produktuak jaten ditugula esan dezakegu, gureak alegia. Tipulak, azenarioak, tomateak, eta nola ez, kalabazak kiloka jaso ditugu. Hasieran, Haur Hezkuntzarako proiektua izan behar zuena, Lehen Hezkuntzako ikasle talde bat ere ari da laguntzen, argazkian ikusten den bezala. Baratza nola landu ikusteko eta ikasteko aukera ezin hobea dute gure ikasleek.
